Un cuart di secul pe “piçule maratone” di Udin

E sarà une “edizion speciâl” par celebrà i 25 agns. La “Maratonina”, piçule maratone internazionâl “Citât di Udin”, che ai 21 di Setembar e tornarà par fâ fieste pal prin cuart di secul e à za viert lis iscrizions cul anunzi di un program une vore siôr, che si vierzarà ai 18 di Setembar cuntun ospit di ecezion. Lorenzo Barone, esploradôr, coridôr e viazadôr ‘estrem’ (par esempli, dute la Afriche fate di bessôl), al contarà lis sôs impresis li dal Città Fiera. Par chel che al rivuarde la gare, il percors al varà un itinerari gnûf, simpri tacant di Zardin grant. Confermis ancje pai altris apontaments classics: la crono scjalade sul Cjistiel, la MiniRun e la corse cul cjan, dutis in program ai 20 di Setembar. Lis iscrizions a son za viertis a presit ridot fint ai 3i di Mai. (A.I.) – 06.05.2025