Alessandro barbano, gjornalist, docent e scritôr, dai 26 di Otubar al sarà il gnûf diretôr responsabil dai sîs cuotidians dal Grup Nord Est Muiltimadia (Nem): Corriere delle Alpi, Il Piccolo, Mattino di Padova, Messaggero Veneto, Nuova Venezia, Tribuna di Treviso. La sô nomine e je stade decidude dal Cda di Nem, che si è cjatât miercus passât a Vignesie, sot de vuide di Enrico Marchi.
Tal passât, Barbano al à diret Il Messaggero di Roma, Il Riformista, Il Mattino di Napoli, il Corriere dello Sport-Stadio e L’Altravoce e al cjape il puest di Paolo Possamai, che tal Novembar 2025 al veve assumût la incarghe ad interim e inte suaze di un schirie di progjets di rilanç des testadis dal Grup. Possamai al torne cussì a fâ il diretôr editoriâl dal Grup.
“O soi une vore content e sodisfat – al à dit Marchi – de nomine di un professionist e di un om di culture di grande esperience e grant profîl tant che Barbano, che o soi sigûr, al darà altris sburts al procès di svilup des testadis Nem”.
Laureât in jurisprudence a Bologne, gjornalist professionist dal 1984, Barbano al svante 45 agns di profession. Al à insegnât gjornalisim inte Universitât la Sapienza di Rome, inte Universitât dal Molise, inte Link University e inte Universitât Suor Orsola benincasa. Al è autôr di dîs libris dedicâts al gjornalisim e a cuistions di caratar politic e sociâl, che tra chei a son “La gogna”, Marsilio 2023; “L’inganno”, Marsilio 2022; “Troppi diritti”, “Le dieci bugie” e la “Visione”, Mondadori 2018-2020, “Dove andremo a finire”, Einaudi 2011, Manuale di giornalismo, Laterza 2012. (a.d.g.) – 25.09.2026
