A son 3.655 lis personis judadis de Caritas tra la provincie di Udin e chê di Pordenon: il 48% di lôr a son talians e il 51% dai nuclis al è fat di almancul trê components, di spes cun fîs piçui. Tai trê agns a son stadis judadis 1.274 fameis e trê su cuatri a àn rivât a passâ la crisi cence domandâ altris intervents.
Par lâ indenant il tal sostignî, Fondazione Friuli e lis Caritas di Udin e di Concordie – Pordenon a àn firmât il cuart protocol di intese, finanziât cun 300 mil euros adun cun Intesa Sanpaolo. “No sin no a judâ la Caritas, e je la Caritas che e jude no a spindi ben lis risorsis a pro des fameis in dificoltât”, al sotlinee il president Bruno Malattia.
Lis situazion di dificoltât a cambiin di continui: “No son puars gnûfs, ma realtâts sociâls che a mudin di continui” al à spleât il diretôr de Caritas di Udin pre Luigi Gloazzo, ricuardant il pês de pierdite dal lavôr, des malatiis, de solitudin e des fameis cuntun sol gjenitôr.
A pesâ a son ancje i coscj de cjase e des boletis: “A cressin i lavoradôrs puars e lis personis che, ancje se àn un redit o une pension, no rivin a fâle” al à dit il diretôr Andrea Baracchino. Lis domandis di jutori, al à visât, a son ladis su ogni an tra il 10 e il 20%. (a.d.g.) – 25.09.2026
