La Vuardie di finance di Gurize e à scuviert une grande evasion leade al disfrutament de lavoranzie tal setôr vitivinicul, cjatant 107 lavoradôrs in neri.
La indagjin e jere tacade de operazion “Caravelle”, che e veve fat investigazions par dâ cuintri al caporalât e fate dai financîrs di Gurize tal 2023, sot de vuide de Procure de republiche. Di chê operazion al jere saltade fûr une organizazion criminâl che e lavorave intai cjamps tra il cjâf lûc dal Friûl Orientâl e Udin. Che organizazion e gjestive cetancj lavoradôrs pe manutenzion dai vignâi, che a jerin costrets a lavorâ in cundizions di fuart disfrutament. I cuatri responsabii di chê bande a jerin stâts arestats tal Fevrâr dal 2023 (trê rumens e un moldâf) cu la acuse di caporalât e vuê al sta lant indenant il procès cuintri di lôr.
I financîrs a vevin scuviert in chê volte che dut al vignive vuidât di une societât che e veve sede formalmentri in Romanie, ma che in realtât e lavorave ad implen in Italie e cussì e faseve a mancul di paiâ le Iva, intant che ai 107 lavoradôrs rumens no vignivin paiâts i contribûts nancje tal lôr Paîs cun retribuzions di 3 euros par ore e un nivel di disfrutament di no crodi.
I aciertaments fiscâi dal 2019 al 2023 a àn fat saltâ fûr un redit no declarât di passe un milion di euros, Iva evadude par passe 200 mil euros e ritignudis no viersadis par plui o mancul 80 mil euros. L’aministradôr de societât di lâ des sanzions al varà ancje di rispuindi dal reât di mancjade presentazion des declarazions. (a.d.g.) – 24.09.2026
