A restaran cence aghe i rubinets des cjasis in cetancj comuns des Vals dal Nadison e de zone culinâr, par vie dai lavôrs che il Cafc al varà di fâ li a Dartigne, indulà che si cjate une impuartante junzion idrauliche che e à bisugne de sostituzion di une valvule de condote. I lavôrs as jerin previodûts tal principi par lunis ai 21 di Setembar.
La sospension dal servizi e tacarà tor des 11 di matine in ciertis zonis di Paulêt, Nimis, Faedis, Osôf, Torean e Prepot. Tacant di misdì e sarà la volte di Atimis, Trep Grant e ciertis frazions di Tresesin; de une dopomisdì e tocjarà a altris zonis di Faedis e Paulêt e, une ore dopo, servizi sierât a Cjassà e Nimis. Aes trê dopomisdì, cence aghe Reane dal Roiâl, des 5 dopomisdì ancjemò Tresesin e ciertis stradis di Tavagnà e localitâts di Prepot; par finî, des 7 sot sere, cence aghe cuatri frazions di Faedis. Il disservizi al podarès lâ indenant fintremai de miezegnot.
Di altris bandis al sarà pussibil un sbassament de pression. Cuant che e tornarà le aghe, Il cafc al consee di lassâ cori le aghe frede se e ves di jessi turbite.
Pes emergjencis al è disponibil, come simpri, il numar vert 800 903 939. (a.d.g.) – 25.09.2026
15
