I trê dîs de “Maratonina” a Udin

La prime novitât de vincjesime seste edizion de “Maratonina”, la mieze maratone internazionâl “Citât di Udin”, che e sarà fate dal centri storic di vinars ai 18 e fint a domenie ai 20 di Setembar, al è il percors di gare. Gnûf e une vore svelt, al è stât ideât di Manuel Burello e certificât tai siei 21,097 chilometris di Stefano Bassan de World Athletics, e al sarà bon par cinc agns. Par sigûr, ideâl par valorizâ lis particolaritâts e lis bondancis storichis e ambientâls dal teritori. Studiât in detai par ogni metri par garantî sigurece ai miârs di partecipants e al public che al à simpri partecipât al spetacul, si disviluparà tai confins di Udin e di Tavagnà, tacant di viale della Vittoria e Zardin Grant, po dopo jù tal viâl Triest, su in plaçâl Osôf, via Tavagnà e, daspò dal passaç tal comun che al è dongje, dut il rest dal percors in comun di Udin, passant pal stadi di balon int fint a rivâ in place de Libertât. Une altre novitât e je la “Fiaso Run”, une corse pe salût che e scree il gnûf campionât nazionâl dai operadôrs sanitaris, dentri de Maratonina, ma cuntun percors dut so e cualchi iniziative di nivel, a tacâ di une cunvigne cu la presince dal Ministri de salût, Orazio Schillaci, e de campionesse olimpiche Manuele Di Centa. E po dopo, come simpri, ducj i altris apontaments di un fin de setemane une vore lunc: de crono scjalade (par invît) dal cjistiel ae corse cui cjans fint ae “Mini Run” e la tradizionâl “StraUdine”. (A.I.) – 17.09.2026