A son vincj i violiniscj sot dai 13 agns in gare pe otave edizion dal “Piccolo Violino Magico”, un dai plui innomenâts concors internazionâi par zovins e fruts, dal prin ai 7 di Lui a S. Vît dal Tiliment. Inmaneade de academie di arcs “Arrigoni”, che e compagne lis esecuzions dai concorints, e je stade pensade dal grant violinist Pavel Vernikov, president de jurie e di simpri e je vuidade di Domenico Mason. La rassegne e je une sburtade pe cariere dai zovins musiciscj intun ambient stimolant sedi dal pont di viste professionâl che tecnic. I zovins che a vegnin di passe 15 Paîs a varan di sunâ, cu la orchestre, in plui di une selezion. Dome cuatri di lôr a rivaran inte finâl, là che a saran compagnâts de FVG Orchestra. Dutis lis fasis finâls dal concors a laran in mondovision su la emitent “The Violin Channel” di New York, un pont di riferiment par dut il mont dai passionâts di musiche classiche, che e à za passât lis ultimis edizions dal concors. (A.I.) – 01.07.2024
Foto di E. Falaschi
