Venier al sune i ‘salms’ dal jazzist inglês

Za tai agns Nonante e ancje dopo, il jazzist canadês – ma atîf te sene inglese par cincuante agns – Kenny Wheeler al fo plui di une volte in Friûl par sunâ cul pianist Glauco Venier intune schirie di discs che a son jentrâts te storie, no dome la nestre. Intune di chestis visitis, il trombetist e compositôr al à scrit vot tocs di musiche ispirade a ancjetancj salms de Bibie, i prins vot di re David: la ispirazion e jere stade un conciert di musiche sacre tal Domo di Udin. Daspò di 12 agns de muart di Wheeler, il jazzist di Gardiscje di Sedean – che al veve vût chês partiduris des mans dal grant musicist – al à decidût di doprâlis par un gnûf progjet. Un grant conciert, anzit, par jessi precîs, un “Oratori par vôs, corâl e grup strumentâl” che si clame “Psalms – Friuli 1976_2026”. Produsût di Euritmica, il conciert al sarà presentât ai 28 di Mai tal Domo di Vençon e ai 30 a Vile Manin di Passarian in dôs seradis a jentrade libare te suaze dai avigniments pai cincuante agns dal taramot dal Friûl. Par une “pene” cussì impuartante, Venier al è metût adun un grup di grandis vôs e un altri cun musiciscj jazz sedi di chenti che di innomine internazionâl, de cjantante Norma Winstone (che e à regjistrât cun Venier pe etichete jazz todescje ECM) al trombetist Paolo Fresu, la corâl Kairos Vox e il diretôr di dute la orchestre Valter Sivilotti. (A.I.) – 22.04.2026