“Suns Europe”: il Friûl al torne une vetrine di lenghis e lengaçs artistics

Il Friûl al è pront par tornâ a dâi acet aes vôs de Europe plurilengâl. Dai 27 di Novembar ai 6 di Dicembar al torne “Suns Europe”, il festival des arts in lenghe minorizade che al instrece musiche, leterature, teatri e cine intun dialic jenfri culturis e identitât. Une rassegne che di passe trente agns e tramude il teritori intun pont di incuintri tra lis tantis lenghis minoritariis dal Vecjo Continent e che e dimostre cemût che la diversitât linguistiche no sedi dome un patrimoni di conservâ, ma ancje une forme di espression artistiche vive, vivarose e contemporanie. Il festival, organizât ogni an de cooperative Informazione Friulana, editore di Radio Onde Furlane – cu la poie finanziarie de Regjon, de ARLeF – Agjenzie regjonâl pe lenghe furlane, dai Comuns di Udin e Codroip e de Fondazion Friuli, in colaborazion cun cetancj altris sogjets public e privâts- si conferme tant che une des esperiencis culturâls plui origjinâls e ricognossudis a nivel european. Par dîs dîs, il Friûl al deventarà une vetrine di lenghis e di lengaçs artistics, intal dâur acet e autôrs, regjiscj e musiciscj di dut il continent, intun percors che al centri di dut al varà la fuarce creative des comunitâts linguistichis minorizadis. La musiche e sarà inmò une volte il cûr vîf dal festival, cuntune schirie di concierts sparniçâts tal teritori dai 28 di Novembar, che a anticiparan il grant finâl dai 6 di Dicembar tal Teatri gnûf “Giovanni da Udine”. Dongje de musiche, Suns Europe al rionç il so impegn intal promovi dutis lis formis artistichis,cu la sezion cine che e torne alì dal Visionario di Udin, e a completâ il program a saran i incuintris leteraris e “Scuele Europe”, une conference conciert cun students e artiscj intun dialic sul valôr dal plurilinguisim. (A.I.) – 29.10.2025