Un an dut passât a esplorâ la narazion tant che mieç pe inclusion, par cumbinâ une gjenerazion cun chê altre e pe rigjenerazion dal teritori. Tacat vie pe Sierade dal 2025 te Cjase di Catine a Vilalte di Catine, si siere il progjet “Cambiare le storie”, cambiâ lis storiis, di Damatrà, la associazion che e à mudât il spazi intun lûc culturâl permanent pe comunitât. Cul mês di Setembar il percors si siere cuntun cartelon di events comunitaris che a contin un an di incuintris di zovins, nonos e personis flevaris. Ai 11 e 12 di Setembar, ducj adun a laran sù sul palc di sene par screâ la dimension artistiche dal “Nûl di sunôrs” te Cjase di Catine, un palc a forme propit di nûl metût adun dal artist Emanuele Bertossi: sunadôrs dai 8 ai 88 agns, cu la stesse passion, tirâts dentri tes esibizion de Orchestra Diffusa e dai The Dreamers. Sabide ai 12, il nûl al darà acet a une vere maratone di musiche dal vîf cun grups dal teritori, sîs esperiencis e storiis diferentis, dal rock al jazz, cui Damaj (dai 12 ai 18 agns!), Sisma, Riptide, Loosing Money e altris. Par saludâ il public, si fevelarà dai temis di chest an di lavôr – il benstâ, la biodiversitât… – cuntun laboratori martars ai 15 dedicât ae racuelte, vinars ai 25 la serade dal “bal di comunitât” vuidât di Nicoletta Oscuro e Hugo Sameck, sabide ai 26 la Fieste de sierade par scambiâ semence e plantis un cul altri e ai 27 lis “contis in moviment”, in biciclete, dal Mulino Nicli fint ae Cjase di Catine. (A.I.) – 10.09.2026
Foto di L. Chiandoni
