Musiche e peraulis pal patriarcje

Une prostitude e un patriarcje par une storie di cospirazions e di tradiments metudis te suaze de Republiche di Vignesie. Inte torate di Sante Marie, tal cûr di Udin, i Concierts “Torriani” a presentin “Orsola” vinars ai 6 aes cinc di dopomisdì. Cheste e je la storie dal complot cuintri il patriarcje Beltram, ven a stâi Bertrando De Geneys, scrite di Bruna Braidotti e ispirade in mût libar dal romanç di Guerrino Ermacora “Terra di uomini” (Tiere di oms). La stesse Braidotti e sarà sul palc di sene adun cul grup musicâl di fiâts Euterpe, cu lis musichis par cure di Luisa Sello. La storie, che si disvilupe in cinc mês, e mostre un senari scûr intune tiere dominade dai oms, dulà che lis feminis a àn un puest margjinâl, e dispès a son consideradis dome che spoi di vuere pai mercenaris. (A.I.) – 05.03.2026