Musiche cence barieris cun trê orchestris tal Teatron

La musiche tant che inclusion cence barieris e je al centri dal avigniment di sabide ai 7, cuant che a laran sù sul palc dal Teatri Gnûf “Giovanni da Udine” i 80 elements che a formin la Orchestre inclusive fate dai musiciscj di trê orchestris: Ami-Ritmea di Udin, OFF-la Orchestre zovine Filarmonici Friulani e une des primis orchestris talianis inclusivis, AllegroModerato di Milan. La origjinalitât dal conciert de Orchestre Inclusive, fate di musiciscj cun e cence disabilitât, e sta inte sô nature pionieristiche pe promozion de art tant che mieç di inclusion sociâl. L’avigniment al è un grant travuart pes ativitâts des scuelis de Ritmea, rivade ai siei prins 30 agns di ativitât, che dal 2017 e à dât vite al progjet AMS-Ativitât Musicâl Inclusive, dimostrant che la inclusion sociâl e je buine di creâ un contest educatîf unic di integrazion sociâl. (A.I.) – 06.12.2024