La capitâl de danze e torne a Feagne

Di joibe ai 24 a domenie ai 27 e torne la tierce edizion dal “Fagagna Dance Festival”, l’event dedicât ae danze contemporanie che al puarte une schirie di artiscj che a rivin de regjon, de Italie e dal forest. Il festival al è ideât e diret di Pablo Girolami, ancje fondadôr di IVONA, la compagnie di danze contemporanie e associazion culturâl di Feagne dal 2019. L’obietîf al è chel di celebrâ la vitalitât e la bielece de danze in dutis lis sôs formis midiant di un festival che al cjape dentri la citât, la comunitât e dute la zone. Il program al met dongje artiscj locâi, talians e internazionâi; di là des des compagniis furlanis IVONA, Bellanda e Arearea, a partecipin ancje grups e artiscj de Pulie, de Polonie, dal Portugal, de Spagne e de Gjermanie. I cuatri spetacui principâi des seradis, clamâts dome “Ats I, II, III e IV”, a rapresentin ognidun diviersis oparis sielzudis pe lôr fuarce compositive interpretative, buinis di fâ imagjinâ viaçs interiôrs e di lassâ a ognidun la libertât di fâsi la sô leture. (A.I.) – 23.09.2026