Il teatri furlan si interoghe sul so presint

Inte suaze de cuarantesime seste edizion de Fieste de Patrie dal Friûl, il Teatri Stabil Furlan e la Atf – Associazion Teatrâl Furlane a àn decidût di inmaneâ, sabide ai 15 inte sale Civiche di place de Vitorie a Caprive, une cunvigne sui stâts gjenerâi dal teatri furlan: “Teatri furlan: il stât da l’art”. Fin a cualchi deceni indaûr, al jere normâl un confront corâl e costant de bande di dutis lis componentis dal teatri e il risultât di chest scambi al consintive di formulâ strategjiis culturâls di man in man plui impuartantis. Une pratiche buine, vuê sparide, propit intun moment che i cambiaments intal setôr a domandaressin rispuestis gnovis. Cu la cunvigne, vierte a ducj des 10 di matine, i tancj relatôrs dal setôr a ciraran di dâ rispuestis costrutivis aes tantis domandis in pîts. (A.I.) – 14.04.2023