Cinc concierts in cinc teatris e un repertori che al va de Russie di Musorgskij ae New York di Gershwin. La seconde stagjon di “Io Sono Sinfonica” de FVG Orchestra, dai 31 di Otubar e fint ai 18 di Dicembar, e je une conferme dal leam cul teritori de Sinfoniche regjonâl, espression di une identitât artistiche locâl, ma simpri plui di là dai confins regjonâls e ancje talians. E ancje dal pont di viste tecnic, ogni an che al passe a rivin musiciscj gnûfs par programs rinovâts e cuntune esplorazion continue dai lengaçs espressîfs. “La espression – doprant lis peraulis dal president Paolo Petiziol – di une incressite cence polse e une viertidure viers la Europe”.
Il prin conciert de stagjon al sarà la “Rapsodia in blu” tal Teatri gnûf “Giovanni da Udine”, cul diretôr Paolo Paroni e Pasquale Iannone al piano, intant che ai 9 di Novembar tal “Candoni” di Tumieç a rivaran pe prime volte in regjon i Take 6, vincidôrs di dîs premis Grammy. I sîs cjantants americans che a instrecin gospel, jazz, soul e R&B, a sunaran cu la orchestre direte di Angelo Valori.
Ai 18 di Novembar, tal teatri “Maurensig” di Felet, l’ospit de orchestre al sarà il violoncelist Giovanni Sollima, ai 8 di Dicembar tal “Bonezzi” invezit Alexander Lonquich, ancje diretôr de “Quarte” di Mahler. Par sierâ, ai 18 di Dicembar, il conciert di Nadâl tal teatri “Verdi” di Pordenon, diret di Vito Clemente, une des ultimis tapis dal percors “In spiete di Pordenon Capitâl 2027”. (A.I.) – 29.10.2026
