A saran metûts a puest, dentri di un progjet di valorizazion dal lât di Rabil, i doi edificis che a jerin doprâts a servizi de miniere e che di une vore di agns a son in stât di abandon. Tal stes timp a saran tirâts vie i pilons de linie eletriche che e puartave corint di Rabil fintremai tal edifici indulà che si cjatavin lis pompis par tirâ sù la aghe dal lât e mandâle intai implants de miniere.
A progjetâ lis oparis su incarghe dal Comun di Tarvis, l’inzegnîr Carlo Conti, titulâr de societât Rizzani Conti+Associati di Udin, che al à preparât il studi di fatibilitât, aprovât ai 9 di Otubar de Zonte Regjonâl, e ancje il progjet definitîf dai intervents.
“Si trate di tocs di archeologjie industriâl – al conferme l’inzegnîr Conti – che a àn un valôr storic e a testemonein de ativitât minerarie fate in chel lûc. Al è stât par chest decidût de aministrazion di Tarvis di tutelâ e recuperâ chei edificis te suaze di un percors naturalistic a pît che si disvilupe dut ator dal lât.
I lavôrs a costaran 850 mil euros in dut: a saran tirâts vie plui o mancul 17 pilons de energjie e a saran metûts a puest sedi la tor di manovre, sedi l’edifici che al à ancjemò lis oparis di prese de aghe. Tal câs de linie eletriche al sarà recuperât sedi l’açâl dai pilons sedi il ram dai cablis.
Il progjet esecutîf, nus à confermât il progjetist, al è za tes mans de aministrazion comunâl di Tarvis che e lavore in delegazion aministrative de Regjon e cumò a stan preparant lis cjartis pe gare di apalt.
L’intervent plui urgjent al è dal sigûr chel su la tor di manovre, che al somee e sedi stade fate sù ae fin dal 1800 e e je une vore ruvinade ae base daspò di cetancj agns di abandon ancje par vie dal fat che a jerin stadis dopradis pieris e modons, tant che il fabricât nol è considerât sigûr. La tor e vignive doprade par vierzi e sierâ il passaç de aghe tal tubi che al puartave la aghe ae miniere a doi chilometris di distance. I lavôrs a metaran a puest lis parêts, i puiûi di fier cumò ducj rusinîts che a saran cambiâts cun altris gnûfs di pache e il cuviert che al sarà ancje chel fat gnûf, cul stes materiâl che si doprave une volte, ven a stâi dut in len, ancje lis scjandulis di laris, al puest de lamiere che e je cumò.
Al è in cundizions miôr il fabricât clamât Sale des pompis, che al jere stât fat sù ator de metât dal secul passât no masse lontan, doprant dome ciment armât. Ancje se in chest câs no son risis che al vegni jù dut, la struture e à bisugne di jessi justade parcè che si sta stacant des parêts la stabilidure, par vie de umiditât e dai musclis e des plantis che a son cressûts tes zontis de struture. Ancje il so cuviert, che al ven cumò doprât de int par butâsi tal lât, al sarà metût a puest par blocâ la corosion dai fiers e al sarà protet no dome di une fodre che e tegni dut al sut, ma ancje di un cuviert fat ancje in chest câs doprant scjandulis di laris. Ducj i tocs di fier, che a son mangjâts de rusin, a saran metûts a gnûf o cambiâts. (a.d.g.) – 29.10.2026
