Une fuide acidentâl di gas e à causât tor de une dopomisdì di vuê il sclop intun apartament al tierç plan di une palacine in vie Val Saisera, tal cuartîr Rizzi di Udin. Dôs les personis feridis: l’incuilin e un amì che al jere cun lui, ducj e doi intimpâts. Il ferît plui grâf al à lesions ae muse par vie dal sclop.
Des primis investigazions al some che il sclop al sedi leât ae une pierdite tal tubi che al puarte il gas ai fornei. La fuarte deflagrazion e à scjassât il condomini e spaventât i vicins di cjase. Al somee che l’incuilin al fos rivât intal condomini di un pâr di setemanis e che plui di cualchidun al veve segnalat compuartaments sbaliâts dal om.
Ae fin des ativitâts par meti in sigurece l’apartament e des verifichis i Vigjii dal fûc a àn confermât la agjibilitât de palacine e ducj a àn podût tornâ dentri cjase. (a.d.g.) – 27.10.2026
