Arestat dai carabinîrs de Compagnie di Udin un om di 21 agns resident fûr regjon e acusât di fraude cuintri di un e siore intimpade, te suaze di une operazion par dabon ben fate adun cui coleghis di Palme.
L’arest al è stât fat îr tor misdì e mieç li de stazion des corieris a Udin: i militârs a stavin lant daûr dal delincuent viodût in citat fin de matine. Montat suntune machine l’om al jere lât fintremai te Basse furlane e al jere jentrât intun condomini par jessi ôc dopo cun vistîts, par dopo tornâ te auto ae volte di Udin. Intant che i stavin daûr i militârs a àn clamât i coleghis de Compagnie di Palme parcè che e controlassin ce che al jere sucedût tal condomini. I carabinîrs di Palme a àn cussì scuviert che il zovin al jere a pene stât di une siore di 85 agns che e jere ancjemò al telefon cul compliç dal fraudadôr che al contave di jessi un maressial dai carabinîrs. La fraude e jere chê solite: un om la visave che e jere stade fate une rapine e che e veve di consegnâ dut l’aur che e veve al carabinîr che al sarès rivât a cjase sô.
Aprofitant di un moment di disatenzion de siore il fraudadôr al è scjampât puartant vie ce che al jere su la taule, ven a stai vistîts e zoiis.
I militârs che a stavin daûr dal delincuent vude la conferme di ce che al jere sucedût a son intervignûts cuant che il zovin al è smontât de machine li de stazion des corieris di Udin. Puartât tal Comant provinciâl al è stât percuisît e a son saltadis fûr zoiis e aur par passe 120 grams cuntun valôr di plui o mancul 10 mil euros.
Lis zoiis a son stadis tornadis daurman indaûr ae siore intant che il fraudadôr al è lât dret in preson a Udin. (a.d.g.) – 22.10.2026
