Il Pordenon al torne a Fontanefrede e al cambie l’alenadôr

Rivoluzion su la bancjute dal Pordenon. Dopo la ‘fieste’ par jessi tornâts a cjase, intal implant di Fontanefrede, dopo vê zirât par agns tra Udin e Lignan, i ‘Sborfs’ a àn cambiât l’alenadôr Domenico Di Carlo, che al jere stât sielt pe sô esperience. La pate 1-1 cuintri la Pergolettese, ae prime al ‘Tognon’, no je plasude al president Mauro Lovisa, che al pense di vê costruît une scuadre buine di tornâ daurman in B. Il sostitût di Di Carlo al è Mirko Stefani, za ae vuide de Under 17 e ex cjapitani de scuadre cun 166 presincis in 7 campionâts, fra C e B, fin al 2022. Un pont di riferiment tecnic e ancje uman, che al cognòs dafonts Pordenon. (A.I.) – 07.03.2023