A Udin lis gnovis pontadis de serie Tv di Teresa Battaglia

da Andrea Ioime

Ancjemò une volte lis placis e i cjantons dal centri storic di Udin a son stâts sielts tant che lûcs pal cine. Ciertis viis de citât a fasaran di fat di fonts aes ripresis de serie TV “Ninfa dormiente”, basade sul omonim romanç de furlane Ilaria Tuti, grande ecelence de leterature contemporanie taliane. La serie, prodote di Publispei e Rai Fiction, cul supuart de Fvg Film Commission, e sarà mandade sui canâi Rai daspò dal grant sucès di “Fiori sopra l’Inferno”, la prime serie tv basade su lis storiis de Tuti, cun Elena Sofia Ricci inte part de famose protagoniste Elena Battaglia. La citât di Udin e sarà protagoniste des ripresis tor des feriis di Nadâl, dai 18 ai 22 di Dicembar. Il set al cjaparà dentri la cort di Palaç Morpurgo e place Domo, po dopo si movarà in Graçan, in vie Muratti, in plaçute Gorc e inte androne cul stes non. Infin, a fasaran di fonts aes senis de serie tv ancje vie Liruti e i zardins dongje. In vie Redipulie, tal marcjât di Vat, al sarà invezit il cjamp base operatîf de produzion intai dîs che lis telecjamaris a saran impegnadis in citât. (A.I.) – 05.12.2023

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui