Il sindic di Cjons Renato Santin al è stât cjatât cheste matine cence vite intal jet de sô abitazion, salacor par vie di un infart. La scuvierte e je stade fate de femine. Il prin citadin, comercialist e revisôr contabil, al veve fat 65 agns martars passât. Al jere stât elet pe prime volte intal 2016 e riconfermât intal Otubar dal 2021, tant che esponent de liste civiche “Obietîf Comun”.
La gnove e à fat in curt il zîr dal paîs, lassant cence peraulis i citadins, i aministradôrs locâi e i coleghis sindics dal Friûl Ocidentâl. Scjassade massime il vicesindic Laura Doro. E sarà jê cumò a cjapâ la incarghe di prin citadin.
Colpît ancje il mont de scuele, viodût che Santin par agns al veve insegnât li dal istitût Sarpi di S. Vît dal Tiliment. (a.d.g.) – 24.08.23
