Lis fameis che in regjon a presentin la situazion plui dificile, cuntun Isee plui bas dai 6.000 euros, a son cuasi 34 mil e a son il 18,4% dal totâl (tra chestis 4.685 a àn un Isee compagn di zero). Cheste percentuâl e va sù al 25% in provincie di Triest, intant che in chê di Pordenon si cjate il valôr plui bas (13,8%). Il soiâr massim dai 6.000 euros di Isee al è une des carateristichis par acedi al Supuart pe Formazion e il Lavôr che al funzione midiant la partecipazion a percors di formazion, ricualificazion professionâl, progjets bogns pe coletivitât. Cheste misure e interesse tantis fameis che in passât a podevin contâ sul Redit di Citadinance e al previôt un benefici economic di 350 euros al mês.
Lis personis che in regjon a vivin in nuclis cuntun Isee plui bas di 6.000 euros a son 76.692, pâr al 6,4% de popolazion residente; dome in Trentin-Sud Tirôl si rileve un dât inferiôr (5,2%). Al contrari in trê regjons dal Sud (Calabrie, Sicilie e Campanie) di là di un cuart de popolazion si cjate in cheste cundizion di puaretât grave. Pordenon (5%) e Udin (5,5%) a presentin percentuâi tra chês plui bassis in Italie.
Dome il 15,4% dai nuclis familiârs de regjon al à un Isee superiôr a 30 mil euros (in Italie l’11,4%). Dal 2016 a vuê il pês des fameis cun Isee plui bas di 6.000 euros al è lât jù in regjon dal 26,4% al 18,4%; chês cuntun indicadôr superiôr a 20 mil euros a son passadis dal 24,4% al 34,4%. Plui in gjenerâl intai ultins agns a son cressudis lis misuris nazionâls e regjonâls che ur è colegât il nivel Isee (par esempli si puedin ricuardâ il bonus bebè e la Cjarte famee regjonâl), si che duncje si è slargjade ancje la platee dai nuclis che a fasin domande, che no je componude dome di fameis in dificoltât economiche. (a.d.g.) – 08.01.2024
