La Electrolux e pare vie 86 impleâts a Purcie e a Pordenon

da Alessandro Di Giusto

La crisi Electrolux e cjape simpri plui cuarp. La direzion taliane de multinazionâl e à inviât al ministeri dal Lavôr, aes Regjons Venit, Friûl-Vignesie Julie, Lombardie, Emilie-Romagne e Marcjis, al Ispetorât dal Lavôr, aes organizazions nazionâls e locâls dai lavoradôrs e aes associazions di Confindustrie nazionâl e locâls la comunicazion de viertidure de procedure di licenziament coletîf di 168 tra impleâts e cuadris. I licenziaments a rivuardin soredut il Friûl, dulà che al è presint il centri di ricercje e disvilup dal grup. I puescj a pericul a Purcie a son 73, plui altris 13 intai uficis pordenonês di vie Modotti. A Susegana 34 personis, a Forlì 38, 5 parom a Cerreto, Ancona e Solaro.

La decision e je motivade dal fat che “il grup Electrolux al è daûr a frontâ pierditis significativis di volums intun cuadri di flession dal marcjât european, lât jù sot di 80 milions di unitâts complessivis, o sedi cuntun sbassament di plui o mancul il 12% a pet dal periodi pre-pandemic”. A Purcie i volums de produzion di machinis lavadoris si son ridots une vore, atestantsi a 700 mil tocs par an, tant che ancje i operaris, che a son daûr a lavorâ cul contrat di solidarietât di 6 oris in dì, a son in soreplui di 965 unitâts. Ai 22 di Fevrâr al Mimit al è previodût la taule nazionâl dal blanc, Guvier e Regjon si son declarâts pronts a intervignî. Intant che Fiom, Fiom e Uil a continuin intal lavôr su la tratative cu la aziende, Pd e Moviment 5 Stelle a Pordenon, par bocje dai coordenadôrs provinciâi Fausto Tomasello e Mauro Capozzella, a domandin aes istituzions di fâsi sintî. (a.d.g.) – 07.02.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui