Al è di doi miliarts il debit dal Stât talian bande des impresis furlanis

La Publiche aministrazion e à un debit cu lis impresis de nestre regjon di almancul doi miliarts di euros. Chest dât al salte fûr dal calcul fat dal ufici studis de Cgia di Mestre, coordenât di Paolo Zabeo, che al à analizât i paiaments mancjâts dal public bande dai furnidôrs tal 2023. Cheste cifre par dute Italie e je di 58,6 miliarts di euros, il plui alt in Europe a pet dal Pil.

Chescj ritarts no son però colpe de Regjon o dai nestris Comuns o de Sanitât regjonâl, che invezit a pain prime des scjadincis, ma dal Stât centrâl. Metât dai Ministeris – prime fra ducj chei dal Lavôr, de Culture e dai Internis – doi agns indaûr a paiavin in ritart. (a.d.g.) – 10.03.2025