Leçs raziâls e problemis no ancjemò sierâts

La persecuzion dai ebreus in Italie e je seconde par durade inte Europe ocidentâl dome a chê todescje. Il Stât fassist al veve aplicât cun atenzion lis leçs raziâls che a previodevin la espropriazion di cjasis, impresis e terens, la pierdite dal implei, la esclusion des professions. Ma cheste e je dome che une part de storie, parcè che la storiche, sagjiste e academiche Ilaria Pavan e à aprofondît ancje une altre cuistion, no mancul grivie: la azion di un Stât republican che al ignore i ebreus sorevivûts che a cirin di tornâ in possès di cetant che ur jere stât gjavât. Une vicende no ancjemò dal dut concludude a cuasi otante agns de fin de vuere, al centri dal penultin incuintri de rassegne “Apontaments cu la storie”, il cartelon ideât e curât de associazion Friuli Storia, che si tignarà vinars ai 7 aes 6.30 di dopomisdì a Martignà intal Auditorium “Impero”. (A.I.) – 06.03.2025