Contis in classe ispiradis di Floramo

Daûr di une tradizion islamiche antighe, i puints a son agnui cui pîts unîts dentri de aghe dai flums: a tegnin lis alis spleadis, di une spuinde a chê altre, par judâ i oms che a son a stâ su lis rivis contrariis a no sintîsi “rivâi”. A son peraulis cjoltis dal saç “Storie sentimentâl curte dai Balcans”, la ultime prove di autôr di Angelo Floramo. Propit intor a cheste vision poetiche e adun evocative dal svicinament necessari fra “spuindis” contrariis de umanitât, tal mês di Dicembar stât, passe un centenâr di studentessis e students dal Liceu Leopardi-Majorana di Pordenon e des scuelis secondariis de citât e de provincie di Pordenon si son confrontâts pe decime setime edizion dal concors leterari “Raccontinclasse”. Floramo al sarà ospit di onôr al avigniment di premiazion, joibe ai 13 intal ex Convent di Sant Francesc a Pordenon, ae presince de preside Rossana Viola, de jurie e di Andrea Maggi, il professôr plui famôs de television. I tescj finaliscj a saran metûts ducj adun intune publicazion. (A.I.) – 12.02.2025