I cambiaments climatics che a àn savoltât il Friûl-Vignesie Julie (cemût no visâsi dai fûcs e des tampiestadis che a desolin, trombis di aiar e variis episodis di aghe alte su lis cuestis) dilunc dal 2023 a àn vût efiets palês ancje intal cors dal ultin mês dal an. Al è stât un Dicembar atipic, cun temperaduris clipis, pocjis precipitazions e neveadis sporadichis. A son chescj, in sintesi, i ponts principâi dal ultin report fat de Arpa dal F-Vj, elaborât sui dâts e sui avigniments meteorologjics regjistrâts il mês passât.
Par ce che al tocje la ploie, il report al evidenzie che a fin 2023 su cuasi dute la regjon lis precipitazions a son stadis sot de medie, dal 40 al 80% in mancul rispiet al ultin trenteni. Dome su Alps e Prealps Juliis al à plot inte norme.
Il dât plui eclatant, però, al ven sù de leture des temperaduris tocjadis. In planure la temperadure medie mensîl si è atestade tor i 6-7 grâts, un in plui a pet dai dâts dal ultin deceni e ben 1,5 grâts in plui comparant lis temperaduris dai ultins trê agns. A pet dal ultin deceni, in planure e dilunc de marine la tierce decade dal mês e je risultade chê plui cjalde, cuntune anomalie positive di plui o mancul 2 grâts. La seconde decade e je stade plui cjalde di plui o mancul un grât, intant che inte prime il valôr termic medi al è stât di pôc plui bas de norme.
In mont 4 zornadis a son stadis dal dut anomalis. Ai 1, 2, 18 e ai 24 di Dicembar, di fat, in tantis localitâts de mont e dal Cjars a son stadis tocjadis temperaduris record. Tal stes timp ancje la aghe dal mâr e je risultade par grande part dal mês plui cjalde.
Se chescj dâts a segnin anomaliis, ancje lis precipitazions nevosis no podevin jessi di mancul, cun cumui sot de norme a pet dai agns di prime. Un esempli? Al Ripâr Gilberti, a 1.850 metris di cuote, a fin Dicembar, la altece dal tabâr nevôs al rivave dome a 93 centimetris, cirche 30 in mancul rispiet ae medie di 50 agns prime. (a.d.g.) – 15.01.2024
