Un grivi corot al à cjapât il Friûl e dut il grup Media Friuli. Al è muart l’inzegnîr Gianpietro Benedetti, president dal grup Danieli, principâl azionist dal nestri grup editoriâl. Dute la redazion e fâs lis condoleancis ae famee.
Nassût tal 1942 – ai 16 di Mai al varès fat i 82 agns – Benedetti al è jentrât inte Danieli tai Agns ’60 e di dissegnadôr tecnic al è deventât aministradôr delegât e president di un dai grups industriai cu lis lidrîs in F-Vj cjâf inte progjetazion e costruzion di implants siderurgjics, cun plui di 8.600 assegnâts intal Mont e di che 6.000 in regjon. Cavalîr dal lavôr tal 2006, dôs laureis e un diplome in M.B.A. ad honorem, al jere ancje president di Confindustria Udine.
“La Regjon e esprim corot e si strenç ai familiâr e ai dipendents dal grup pe pierdite di Gianpietro Benedetti, leader di une aziende di grant valôr e imprenditôr visionari. Di là di vuidâ par agns il grup industriâl che al è jenfri i prins trê produtôrs europeans di açâl, si è dât tant ce fâ cun braùre e impegn pe sô tiere deventant un mecenat, si è impegnât intal mont de comunicazion e al à inviât ancje cetancj progjets pe formazion dai zovins”. Al è il pinsîr dal president de Regjon Friûl-Vignesie Julie, Massimiliano Fedriga, tal manifestâ il corot de Aministrazion regjonâl pe muart di Benedetti.
Confindustria Udine, a mieç di ducj i soi orghins e in rapresentance di dutis lis impresis associadis e esprim profont aviliment e un grant sens di pierdite pe muart dal so president, un vêr zigant intal mont de industrie e une figure di riferiment par dute la nestre comunitât. “Cu la sô muart o pierdìn no dome un cjâf straordenari, ma ancje un ispiradôr e un amì par tancj di noaltris”. (a.d.g.) – 28.04.2024
