Un altri infortuni sul lavôr inte nestre regjon, cheste volte a Vile di Flum. Un om di 69 agns, intant che al meteve a puest une armadure, al è muart dopo jessi stât cjapât implen sul cjâf di une bene in moviment.
L’incident al è sucedût in vie Kennedy 26, dentri di un arlevament gjestît di Raffaello Sellan. La vitime e lavorave par une altre imprese, incargade di meti su’ la armadure. Stant a une prime ricostruzion di ce che al è sucedût,il lavoradôr si cjatave parsore dal so camion cuant che e je rivade intor la bene.
I socors clamâts daurman dai coleghis no àn podût fâ nuie parcè che il lavoradôr al jere muart par colpe dal traume une vore grâf al cjâf. Sul puest a son rivâts ancje i pompîrs e i carabinîrs che a varan di sclarî ce che al è sucedût. (a.d.g.) – 30.04.2024
