Il pazient al è ricoverât in terapie intensive, ma pai sanitaris si trate di un câs fûr dal ordenari.
Tal ospedâl di Udin al è ricoverât in terapie intensive un om che i àn cjatât il bateri Corynebacterium diphtheriae, chel che al puarte la difterite.
“Il patogjen – al à dit vuê il diretôr sanitari de Aziende sanitarie universitarie Friûl centrâl, David Turello – al è stât isolât intun pazient e cumò al va indenant il control epidemiologjic dal Dipartiment di prevenzion, par limitâ la difusion dal bateri a mieç dai contats cun altre int che l’om al à vût. O ten a precisâ che si trate di un câs fûr dal ordenari parcè che inte nestre regjon intai ultins decenis di agns no son stâts cjatâts altris câs e a son stadis cjapadis dutis lis misuris che a coventin”. (a.d.g.) – 16.05.2024
