I fruts a saran i protagoniscj di doi events promovûts de ARLeF – Agjenzie regjonâl pe lenghe furlane, inte suaze de Setemane de culture furlane. Sabide ai 11 di Mai – te buinore a Martignà, tal dopomisdì a Reane – e sarà une zornade di divertiment e dute par furlan che i plui piçui si visaran ancje pai materiâi didatics che ur vignaran regalâts.
Par partecipâ ai doi apontaments si à di notâsi dentri di miercus ai 8 di Mai, clamant il Sportel regjonâl pe lenghe furlane al 0432 1743400 o cuntune e-mail a info@sportelfurlan.eu.
La zornade e tache cun “Libris, figots e ridadis”, li de Biblioteche civiche “Elsa Buiese” di Martignà (vie Delser 33), aes 10. Un apontament realizât cu la colaborazion dal Comun e la impuartante poie inte organizazion de associazion “Chei di Martignà”. Tal program de buinore e je la leture animade de “Il libri gjat” e daûr un laboratori creatîf. I fruts dai 3 ai 7 agns a varan la pussibilitât di imparâ la lenghe zuiant, ma ancje di “figotâ” il protagonist dal libri (publicât par talian di Minibombo e inte version par furlan de ARLeF), che al vignarà dât fûr ai fruts tant che regâl. Nol è dut, parcè che dopo dal laboratori e sarà une buine mirinde par ducj.
Intal dopomisdì, aes 17, li de Biblioteche civiche di Reane (vie Battaglione Julia 7, a Remugnan) al tacarà “1, 2, 3, 4, 5… Numaruts cun Maman!”, un laboratori ludic e didatic cun Daria Miani, la condutore de trasmission televisive par fruts “Maman!”, organizât cu la colaborazion de Aministrazion comunâl. I fruts a podaran cognossi i personaçs dal carton animât de ARLeF “I Numaruts”: modonuts ducj colorâts e une vore simpatics che cun chei si impare la matematiche cun cjants, zûcs e divertiment. A saran ancje proietâts dai episodis dal carton, che al va in onde propit su Maman! (su Telefriuli, ducj i vinars aes 18:30 e in repliche la domenie aes 7 e aes 13), e che si puedin viodi ancje sul sît de ARLeF e sul canâl YouTube de Agjenzie. Prime di lâ vie, ducj i partecipants a varan un simpatic regâl tant che ricuart dal dopomisdì di divertiment cu la lenghe furlane. (a.d.g.) – 02.05.2024
