Par Feagne e je stade une zornade pardabon particolâr. La Fieste de Liberazion in chest Comun de zone culinâr e je stade celebrade di centenârs di furlans rivâts di ogni bande par firmâ cuintri dal progjet inmaneât de Regjon, che e volarès fâ passâ une gnove strade che di Dignan e puarte bande Feagne e Murùs par dopo rivâ a Colorêt di Montalban e Buie. O fevelìn dal progjet par puartâ indenant la Çumpiel-Secuals fin a Glemone, che di agns al svole su lis culinis dal Friûl come un fantasime o, se cualchidun al à miôr, come une Spade di Damocli.
E je vere che l’assessôr regjonâl aes Infrastruturis Cristina Amirante e à fevelât dome di un studi preliminâr e che duncje no si trate ancjemò di une sielte definitive, ma chei di Feagne a àn di vê pensât che al jere miôr proviodi par timp e fâ capî a chei di Triest (e soredut di Pordenon, indulà che a batin di timp par otignî il gnûf stradon) che i furlans des Culinis a son ingomeâts dal masse asfalt e che no vuelin plui dâ acet a gnovis oparis che a fischin il teritori, soredut se al è ancjemò ben conservât.
A tacâ des dîs di vuê a buinore une lungje code di int rivade di mieç Friûl si è formade li de Oasi dai Quadris, lade indenant par oris e ben dopo il tiermin de une dopomisdì, segn che l’alarme tirât soredut sui Social al è stât scoltât e che une vore di int e domande di cambiâ il mût di doprâ il nestri teritori.
“No si spietavin cussì tante int – nus à dit il sindic di Feagne Daniele Chiarvesio -. O pensi che e sedi une rispueste straordenarie de bande dai citadins e che al sedi ancje un segnâl une vore fuart e clâr che al à di sburtânus a lâ daûr trois diferents e di altris soluzions rispiet a ce che o vin fat fin cumò”. (a.d.g.) – 25.04.2024
