Il festival pe infanzie al rive a Udin

Puartâ musiche, leture e art par promovi la inclusion sociâl di students e fameis e je la mission di “LibrOrchestra”, il festival itinerant pe infanzie, che si ferme pe prime volte a Udin cun cinc apontaments ai 3 e ai 4 di Mai. Dute la programazion si tignarà tal Auditorium de scuele “Valussi”, in vie Petrarca. Ducj i apontaments a saran sore nuie e vierts a fameis, fruts e educadôrs, cun leturis musicadis, incuintris di formazion e spetacui musicâls e teatrâls, interpretâts dal grup cjamaristic Garilli Sun Project e cun ilustrazions proietadis su grancj schermis. Il fîl condutôr di chest an al è “Musiche, art e poesie pe pâs e pai fruts”. LibrOrchestra e ponte cun di plui a rinfuarçâ e consolidâ, cui siei apontaments, lis rêts di colaborazion cu lis aministrazions, lis scuelis, lis bibliotechis, lis librariis, i teatris, i ents e lis aziendis che a dimostrin une sensibilitât particolâr bande la divulgazion de leture e des arts. (A.I.) – 02.05.2024