Lari cjapât intant che al robe in glesie a Cjasarse

Cjapât cu lis mans tal sac un lari intant che al robave i bêçs in glesie. Al è sucedût a Cjasarse, indulà che il plevan al à clamât i carabinîrs dopo vê viodût in azion un om intant che al mateave inte cassele de limuesine inte glesie di vie Risorgimento.

Il lari, un citadin rumen di 37 agns, al è stât blocât intant che al stave jessint fûr de glesie: une volte controlât, i carabinîrs i àn cjatât intor 100 euros, cuasi dutis monedis, un metri flessibil che sul cjâf al veve peât nastri biadesîf e une torce eletriche.

Su disposizion dal Pm di turni il lari al è stât liberât e i bêçs tornâts indaûr al plevan. (a.d.g.) – 19.04.2024