No je bastade la glesie dai Riçs par tignî dentri dute la int rivade par saludâ pe ultime volte Aldo Maklaj, il zovin di 20 agns di Udin, muart te buinore di joibe passât ai 4 di Setembar dilunc de strade Pontebane, intant che al stave lant a vore.
Tante comozion e corot dilunc dute la messe, intes peraulis plenis di sperance di don Giuseppe Faccin, che al à celebrât vuê di matine il funerâl, ma ancje tal salût, ae fin de cerimonie, dai amîs e di chei che a vevin cognossût Aldo, memoreât tant che un zovin bon, pront a dâ une man e simpri legri, cuntune grande passion pal sport. A saludâ la mari Adelina che lu à tirât su cun amôr e dedizion e il pari, di la di tancj albanês che a vivin di agns in Friûl o rivâts su a pueste pal funerâl, a jerin ancje il sindic di Udin Alberto Felice De Toni, i coleghis e i titulârs de aziende indulà che Aldo al lavorave come saldadôr, i rapresentants di cetantis scuadris di balon e tancj zovins, rivâts di dute la regjon
Ae jessude de glesie, intune place che no si rivave cuasi a movisi tancj a jerin i presints, le bare di Aldo e je stade saludade dal sun des cjampanis e dai balonuts blanc liberâts dai zovins. Di li, un lunc corteu al è lât fintremai tal cimitieri dai Riçs, indulà che al polsarà il zovin tant benvolût. (a.d.g.) – 11.09.2025
