Une lungje e complicade investigazion, fate de Vuardi di finance di Udin cu la colaborazion de Regjon Friûl Vignesie Julie e la Cjamare di cumierç Pordenone-Udine, e à fat saltâ fûr une fraude une vore grande leade al fat che a vignivin dopradis tessaris par ve il scont sui carburants, tant che passe un milion di litris al è stât dât fûr in maniere ilecite.
I financîrs a àn incrosât i dâts cjatant grandis anomaliis tai compuartaments e tai documents, tacant cussì aciertaments smicjâts bande dai gjestôrs dai distributôrs, ma ancje di citadins titulârs de tessare.
La Vuardi di finance e à scuviert che i gjestôrs di cierts distributôrs a fasevin finte di dâ fûr carburant o a fasevin anulaments, dome par vê indaûr i rimbors economics domandâts ae Regjon. Lis investigazions a àn ancje fat saltâ fûr la scoretece di une vore di citadins che a continuavin a doprâ la tessare ancje se no vevin plui la machine che e je colegade parcè che la vevin vendude, puartade tal forest o fintremai butade vie.
La ativitât des Flamis zalis e à aciertât la ae erogazion injustificade di passe un milion di litris di carburant e rimbors otignûts in maniere no lecite a dam des cassis de Regjon par passe 240 mil euros. A son stâts denunziâts cuatri gjestôrs di implants.(a.d.g.) – 18.09.2026
