Cuasi 700 mil euros pe ricualificazion des casermis a Palme

“La fuartece di Palme e je daûr a tornâ al antîc splendôr”. Al è’ il coment dal sindic di Palme, Giuseppe Tellini, dopo la assegnazion di 670.000 euros de Regjon cuntun bant regjonâl che al rivuarde progjets di ricualificazion di areis degradadis. I bêçs a saran destinâts ae ricualificazion e al recupar de aree devant de ex caserme napoleoniche Filzi, intal grup de ex caserme Ederle. Al sarà cussì pussibil sdrumâ doi edificis zimui in ruvine, un capanon e altris dôs struturis che cumò a impedissin la vision gjenerâl e, soredut, la gnove viertidure de Strade des miliziis, la vie antighe de Fuartece che e traviersave dut il perimetri interni de Citât, cun funzions militârs. Al sarà cussì pussibil restaurâ part de viabilitât rinassimentâl antighe de Fuartece e ricualificâ la Place di armis devant la struture napoleoniche. (A.I.) – 25.10.2022