Condanâts par robarie om e femine di For Disore dal Tribunâl di Udin

A vevin robât mil euros al anzian vicin di cjase, ma la telecjamare e veve filmât dut e i doi a son stâts condanâts a 8 mês di reclusion. E je la pene decidude dal judiç Mauro Qualizza dal Tribunâl di Udin par un om di 42 agns e une femine di 50 agns di For Disore, ricognossûts colpevui di robarie. Pe femine la pene e je stade sospindude. Il fat al è sucedût a Tumieç intal Fevrâr dal 2021. Il vecjut si jere sentât ae taule cui doi vicins di cjase e al veve contât di vê tirât pôc prime i bêçs dal ufici postâl di For Disore. La femine, alore, lu à distrat intant che il sô compagn al puartave vie dal russacut de vitime la buste zale cui bêçs. I doi, però, no si jerin visâts che intal ambient e jere une telecjamare che e à filmât dut. (A.D.G.) – 13.07.2022