“Il scont carburant in jessi al ven confermât par ducj i Comuns de regjon fin ae fin di Fevrâr. Cun di plui, viodude la situazion leade ai auments fuarts dal presit, o vin decidût di incressi la riduzion di altris dîs centesims al litri, sedi pe benzine sedi pal gasoli, pai residents intai Comuns confinants che si cjatin a mancul di dîs chilometris de Slovenie. Chest par lâ incuintri dal aument dal presit dai carburants in Italie. La gnove incressite di dîs centesims al litri pe fasse confinarie e puarte a un scont complessîf che al rive a tocjâ i 44 centesims al litri. O stin investint tantis risorsis par juda lis fameis intun moment di dificoltât e par difindi il nestri tiessût economic e sociâl”.
Lu à dit il governadôr dal Friûl-Vignesie Julie Massimiliano Fedriga cheste matine dopo la aprovazion in Zonte regjonâl de delibare che e conferme i sconts carburant dai 23 di Zenâr fin ai 28 di Fevrâr cui impuarts previodûts par dutis dôs lis zonis là che al ven aplicât il scont diversificât. La delibare e previôt, cun di plui, l’aument dal scont di altris dîs centesims – pâr al massim previodût de norme – di aplicâsi intai Comuns che a jentrin inte Fasse zero, al ven a stâ i Comuns che i lôr confins si cjatin a mancul di dîs chilometris dal confin nazionâl che a son in complès 74. (A.D.G.) – 20.01.2023