Cuant che i cartei trilengâi a son stâs cambiâts cuntun dome in talian te stazion di Cividât si è jevade une tampieste di protestis e domandis di tornâ a meti dut a puest, cun tant di apel al president de Republiche Sergio Mattarella, fat dal president de Arlef Eros Cisilino e di domande di sclariment dal Comun di Cividât.
Al somee che chei di Rfi a vedin cussì vût miôr taponâ i cartei gnûfs, in spiete si spere di tornâ a meti su chei in talian, furlan e sloven.
Ancje te stazion di Udin S. Gotart i cartei in talian e furlan a son stâts tirâts vie e cumò si spiete di viodi ce che al sucêt parcè che la sostituzion e je stade fate dilunc de linie feroviarie Udin – Cividât, al centri dal 2015 dal progjet “tren des lenghis” concuardât tra Fuc e Arlef che al previodeve di doprâ lis lenghis dal teritori, di la dal inglês, pe segnaletiche, i oraris dai trens, i avîs a vôs e i distributôrs automatics dai biliets. (a.d.g.) – 08.07.2025
