A Cividât la domenie al è il dì dal teatri par furlan

Tal teatri “Ristori” di Cividât e torne la rassegne di teatri par furlan inmaneade dal assessorât comunâl ae Culture. Sîs i spetacui in program, ducj comediis, ogni domenie dai 12 di Otubar e fint ai 28 di Dicembar, ducj fats di compagniis amatoriâls de provincie di Udin. A vierzi la rassegne, aes 5 di dopomisdì, “Il Zavaion” de compagnie Clâr di lune di Bertiûl, une comedie che e conte une storie vere, sucedude in paîs tal 1875, cuant che al jere il re. Ai 26 si va indevant cun “38 dîs par cambiâ vite” de compagnie “Teatro Maravee” di Osôf, e in Novembar cun “L’abit dal frari” de GAD Quintino di Roncjis di S. Denêl e “Canicule” de compagnie Agnul di Spere di Codroip. Ultins spetacui: “Ho una figlia bellissima ma propit biele” dal grup Vecjo Friûl di Porpêt e “Trê feminis par Luca” cu La Pipinate di Sclaunic. (A.I.) – 10.10.2025