Par une setemane, Pordenon e fâs ancjemò une volte lis provis di “capitâl” dal cine cu la cuarantesime cuinte edizion des Zornadis dal cine mut, un event di nivel internazionâl, diret dal espert di innomine mondiâl Jay Weissberg, che al à sielt il teme dal “improibît” e des “trasgressions” par puartâ il public di passionâts indaûr di cent e passe agns. Une esperience antighe e uniche e sarà ancje la vision des peliculis cul acompagnament musicâl, aromai une carateristiche dal festival, che e tache propit de zornade di scree, sabide ai 3 di Otubar, cu la proiezion di un “Zorro” dal 1925, cul innomenât Douglas Fairbanks te part dal eroi in mascare che al sta de bande de puare int. A pene restaurade a Copenaghen, la pelicule e sarà compagnade de Slovenia Symphony Orchestra, che e sunarà la musiche – scrite a pueste pal cine – dal compositôr sloven Andrej Goričar. Une altre propueste – “For heaven’s sake” cun Harold Lloyd e la musiche sunade dal vîf de Zerorchestra – e sarà ufierte vinars ai 2 te anteprime che si fâs tal teatri “Zancanaro” di Sacîl. Dopli ancje il spetacul di sieradure, sabide ai 10 e in repliche domenie ai 11: in dutis lis dôs ocasions al torne a Pordenon une pare mestre di John Ford, “The Iron Horse (Il cjaval di açâl), un dai plui grancj western de ete dal mut, compagnât de Orchestre di Cjamare di Pordenon direte di Ben Palmer, un altri non ben cognossût al festival cu la partidure scrite di John Lanchbery. Il program, simpri plen di retrospetivis, peliculis cjatadis, recuperadis o restauradis, propuestis viodudis di râr sul grant schermi, al previôt un grant event cun orchestre ogni sere tal teatri e une schirie di sezions. A tacâ di “Weimar cence censuris”, che al conte agns complicâts, ma ancje cuntune libertât di produsi une schirie di cines cence limits. La liste des proiezions (che si puedin viodi ancje in rêt) e cjape dentri la seconde part de retrospetive dedicade ae atore taliane Italia Almirante Manzini, une pe stele dismenteade di Hollywood, Marshall Neilan, une schirie di cines gjaponês e spagnûi di cent e passe agns indaûr, i “curts” des avanvuardiis cechis, il viaç fint ae nassite de comedie, i classics sielts dal critic Paolo Cherchi Usai e cetant altri. (A.I.) – 01.10.2026
Foto di Harola lloyd Entertainment
