Il cjant dal ricuart dal taramot

Cincuante agns daspò dal taramot, ancje Tumieç al ufrîs un spetacul par contâ chel ricuart: “Dal rumôr al cjant”, une produzion origjinâl de corâl “Tita Copetti”, che e debutarà tal Teatri “Candoni” sabide ai 26 aes 8 e mieze sot sere. La rapresentazion e instrece musiche corâl, test e azion teatrâl in siet senis, ognidune costruide ator di un diari passât di man in man jenfri ancjetancj protagoniscj. Siet vôs diferentis, fondadis su lis testemoneancis e i ricuarts di prime man di chei che a vivevin in Cjargne in chel timp di precarietât, ma ancje di solidarietât, sacrifici e comunitât. Il côr al devente part ative sul palc di sene, fasint un viaç musicâl traviers di tocs origjinai, classics e dal repertori tradizionâl furlans. I tescj origjinai e la regjie a son di Serena Cescato, invezit la direzion musicâl e je afidade a Daniele Cuder. (A.I.) – 25.09.2026