A Lignan, veretât e bufulis ator dai aliens

Lis “fake news”, ven a stâi lis bufulis, no van mai in feriis! Par formâ il pinsîr critic, il “Fake News Festival 2026” al rive a Lignan pe prime volte une “edizion dal Istât”, imbinant culture, sience, satire e istruzion pai zovins. Il prin teme impuartant tratât intal event di doi dîs a saran i UFO: trope veretât ise intes storiis che si contìn sui aliens? Jenfri osservazions, bufulis e imagjinazion coletive, ancje il Friûl-Vignesie Julie al è une regjon che e à ingrumât une schirie di storiis sui UFO e i fenomens inspietâts. Sabide ai 26 aes 6 di dopomisdì, te place Marcello D’Olivo, al è in program l’event “Isal cualchidun fûr di chi?”: un dialic jenfri culture, sience, satire e informazions sbaliadis cun Adrian Fartade e il grup di” Lercio”. Fartade si impegne inte difusion sientifiche traviers il so canâl YouTube, a è un ospit regolâr tai teatris e tai festival e al à fat deventâ la sô mission chê di passionâ ae cognossince lis gjenerazions plui zovinis. Prime dal apontament cul public , vinars ai 24 e sarà ufiert un incuintri cu lis scuelis, vuidât di Davide Sciacchitano, cun cent students dal Istitût Tecnic “Pietro Savorgnan di Brazzà”. La cuinte edizion dal festival e je programade invezit dai 12 e i 15 di Novembar a Udin. (A.I.) – 24.09.2026