Laboratori di dissen te Val Tramontine

A Tramonç Disore e in dute la Val Tramontine dai 25 ai 27 di Setembar e cjape forme “The Rest Is Art – Il rest al è art”, une residence artistiche di dissen e narazion visive ideade di Valentina Angelone in colaborazion cul palaç dal Fumet di Pordenon. Il progjet, che al è dentri dal program de rassegne “La mont che no tu ti spietis”, al è viert a dissegnadôrs dai 20 ai 35 agns, oms e feminis- Par trê dîs, a laran ator par borcs, boscs, architeturis e trois, cjapant su cualchi note visive e piçulis contis par creâ une leture personâl e poetiche dal teritori. Ogni partecipant al dissegnarà une piçule storie ilustrade di 4-6 tailis, cu la tecniche sielte – dissen cun lapis, acuarel, chine, pastel…. Il risultât al sarà un atlant “sensibil” dai teritori, diferent des vuidis tradizionâls: soredut, bon di contâ ai altris ce che par solit no si rive a viodi. (A.I.) – 23.09.2026