Sbassament des jentradis iregolârs dilunc de Rote balcaniche, il futûr dal tratât di Schengen e la necessitât di blindâ i confins esternis de Union europeane cence paralizâ i trafics dai citadins. A son stâts chescj i argoments al centri dal incuintri trilaterâl su la sigurece tra il ministri dal Interni Matteo Piantedosi e i siei coleghis di Slovenie e Cravuazie, fat vuê di matine dentri Villa Cattaneo a Pordenon.
Dilunc dai lavôrs il ministri Piantedosi al à sotlineât che i dâts a mostrin un sbassament dai ingrès ilegâi tai prins vot mês di chest an dilunc de Rote balcaniche, cuntun câl dal 28% a pet dal stes periodi dal an passât e dal 42% a pet dal stes periodi dal 2024.
A reste vierte la cuistion pluitost delicade dai controi dilunc dai confins che a vadin ancjemò indenant: Piantedosi al à ribatût che la sospension de circolazion libare e je une sielte di emergjence e no struturâl, “cjapade cun ecuilibri e in maniere seletive, studiât a pueste par no pesâ su lis esigjencis de popolazion locâl e di chei che a lavori passant il confin”.
L’obietîf condividût dai trê guviers al reste cussì il ristabiliment dal spazi Schengen, dentri di une curnîs di sigurece. Par sveltî chest procès, la intenzion e je di rinfuarcî la cooperazion sul teren fasint plui patuliis dilunc de frontiere cravuate, cul jutori de agjenzie Frontex e pensant pal futûr, a uficis condividûts sul confin tra Italie e Slovenie, come che za al ven fat sul confin cu la France.
Al incuintri al à cjapât part ancje il ministri dai Rapuarts cul Parlament Luca Ciriani. (a.d.g.) – 22.09.2026
