A son gnovis pardabon buinis par Pro Loco, parochiis, fondazions e associazions cence fins di vuadagn, ven a stâi chês realtâts impuartantis che a fasin restâ vivarosis lis nestris comunitâts: de Regjon a rivaran 2,2 milions di euros che a podaran jessi doprâts par comprâ o par meti a puest i imobii a disposizion.
“Il bant – e à visât la assessore regjonâl aes Infrastruturis Cristina Amirante tal presentâ la delibare di Zonte aprovade ai 4 di Setembar – al judarà soredut tal fâ chei intervents plui impuartants sul patrimoni imobiliâr, tant che l’acuist di imobii o di implants fis destinâts a sede legâl o operative, il slargjament dai edificis e i intervents di manutenzion straordenarie. Il bant al permetarà di finanziâ ancje intervents di eficientament energjetic, eliminazion des barieris architetonichis e l’adeguament aes normativis”.
Dal sigûr chest finanziament al sarà une vore preseât des Pro Loco e no dome, parcè che il bant al previôt, in maniere clare, che il contribût al pues jessi domandât ancje pai imobii e pai implants doprâts par fâ sagris, fiestis locâls o fieris tradizionâls. In cheste maniere al sarà pussibil inzornâ implants che a domandin simpri cetancj bêçs par meti man e li che a son ancje oblics di meti dut a norme.
Il contribût al pues jessi domandât par edificis e implants che a sedin za di proprietât e doprâts tant che sede o par chei doprâts par dâ acet aes sagris, a fiestis locâls o tradizionâls.
Lis domandis a puedin jessi presentadis des realtâts che a vedin sede in regjon e il contribût al cuvierzarà il 100% de spese declarade amissibile fintremai a 70 mil euros, tacant di domandis par plui di 10 mil euros. Al sarà pussibil presentâ une sole domande par ogni ent e par ogni imobil si podarà presentâ dome une domande di contribût, doprant il sisteme in linie “Istanze OnLine”.
I intervents a varan di tacâ daspò che e je stade presentade la domande e i uficis de Regjon a prepararan une graduatorie su la fonde des tipologjiis dal intervent e dal imobil, de acessibilitât, de sostignibilitât sociâl e ambientâl, dai contribûts za otignûts di altris bants previodûts de leç regjonâl 7 dal 2019 e ancje de dimension economiche di cui che al presente la domande.
A disposizion di chest bant a son stâts metûts de Zonte regjonâl 2 milions e 258 mil euros pai agns dal 2026 al 2028. (a.d.g.) – 21.09.2026
