Daspò de agression ae fantate di 15 agns sucedude fûr di un istitût tecnic di S. Vît dal Tiliment, la sô famee e sta cirint messaçs e filmâts, che a sedin bogns par permeti ai carabinîrs di tornâ a fâ su tal detai la dinamiche dal fat. Al è une vore impuartant parcè che la leç no previôt il procediment di ufici cuant che lis lesions a puedin vuarî dentri dai 10 dîs e cence une cuerele di part lis fuarcis dal ordin no puedin lâ indenant.
Il fat che al à scjassât la comunitât al varès vût principi la sere prime de agression, cuant che a son stât publicâts sui Social cierts messaçs. Il dî dopo, tal parcament pôc lontan de scuele, su la fonde di ce che e à contât la vitime, dôs coetanis e compagnis di istitût la varessin prime blocade e dopo pacade. Dulintor cetancj minôrs che a cjalavin cence fâ nuie, e cierts di lôr cul telefonin in man par filmâ e, si pense, par pandi daspò i videos.
A blocâ la agression l’intervent di un insegnant di un altri istitût scolastic che al passave par câs di chês bandis e al à viodût la barufe, rivant a dividi leis fantatis.
Cuant che lis fuarcis dal ordin a cjaparan la cuerele e il materiâl tirât su de famee a podaran lâ indenant par identificâ il numar esat dai zovins cjapâts dentri dal fat, ancje di chei che a àn filmât. (a.d.g.) – 21.09.2026
