La bugade di brut timp previodude tant che la Protezion civîl e veve pandût une alerte par vuê e à tacât a dâ i prins discomuts.
Lis previsions a son stadis rispietadis tant che a son stâts inagaments a Lignan intal viâl Centrale, intes viis Carinzia, Mentana, Carnia, tal Corso degli Alisei e Corso dei Monsoni.
Dilunc vie Carinzia le aghe e je lade sù di cuatri centimetris. Tante aghe ancje dilunc de strade regjonâl 354 che e coleghe Tisane a Lignan.
Problemis ancje a Tisane, cun inagaments come tal borc Aurora, a Aprilie e a Bevaçane, indulà che il sindic al à inviât il centri operatîf comunâl par coordenâ i intervents di Protezion civîl, ancje se pal moment no son segnaladis criticitâts griviis.
Arbui e ramaçs sdrumâts ancje a Udin. Cualchi discomut ancje a Maran, Davian, Pordenon, Cjasarse, Maian e Triest. Tor sere il timp al varès di miorâ. Di vuê di matine aes 6, a son rivadis 38 segnalazions a Protezion civîl e Numar unic de emergjence 112. (a.d.g.) – 17.09.2026
