I tifôs dal Pordenon tra la serie D e la pôre dal faliment

I tifôs dal Pordenon ancjemò no san cemût che al larà a finîle, ma al è cuasi sigûr che la scuadre no zuiarà in serie C l’an che al ven. Vuê e je previodude la presentazion dal plan economic de societât Pordenone Calcio di bande dal avocat Antonio Malattia e di un grup di professioniscj par evitâ il faliment de societât. Cun pierditis di passe 6,5 milions di euros in belanç e ancjetancj debits cul fisc, un plan economic par meti dongje i bêçs che a mancjin al somee la uniche soluzion par evitâ il faliment. Restâ in Serie C dut câs al è dificil, parcè che ai 22 di Jugn e je la ultime dì pe iscrizion in Lega Pro: 48 oris daspò la udience in Tribunâl a Pordenon. Ai 20 di Jugn si savarà duncje se i tifôs dai ‘sborfs’ a podaran viodi la lôr scuadre almancul tra i diletants. (A.I.) – 15.06.2023